Чагыр кышет

Та яратон — чагыр кышет‚
Соин ик эн бӧрды‚ эше!
Дырыз вуэ ке, со кышет
Куддыр бездэ‚ куддыр ыше!

Яратӥськом ке асьмеос‚
Тулыс бусы кадь луиськом:
Синъёсамы — лыз сяськаос‚
Серекъяськом но кырӟаськом.

Син азямы соку сюрес
Зарни чильтэр кадь усьтӥське‚
Тӧдьы льӧмпу сюрес дуре
Соку нылмурт кадь някырске.

Нош вунэтэ ке асьмемыз‚
Пеймыт луэ улон дунне‚
Соку кысэ‚ тӧлӟе ваньмыз‚
Мар вал толон‚ мар вал туннэ.

Соин ик эн бӧрды‚ эше!
Та яратон — чагыр кышет:
Куддыр бездэ‚ куддыр ыше‚
Дырыз вуэ ке, со кышет…

Добавить комментарий

Ваш e-mail не будет опубликован. Обязательные поля помечены *