Удмурт музъемлы

Паськыт‚ бадӟым тэльёсын‚ тыосын‚ нюръёсын
Тон‚ вордӥськем‚ яратон музъеме‚ улӥськод…
Ваньзы тонэ куштӥзы‚ куштӥзы‚ вунэтӥзы‚
Сайкатӥсез чик ӧвӧл! Тон улкод-изиськод…

Тынад вылтӥд тӧл лоба‚ тӧл шудэ‚ тӧл юмша‚
Изись баблес тэльёстэ улӟытэ‚ сайкатэ:
Тынад вылад лыз инъёс-пилемъёс уяло‚
Нюръёсад‚ тыосад туриос кесяськыло…

Пумтэм-йылтэм возьёсыд‚ лудъёсыд‚ тэльёсыд —
Учкыса‚ ветлыса быдтонтэм шаеръёсыд.
Паймоно кадь шуръёсыд‚ ӝужытэсь выръёсыд‚
Кулэм кадь, ваньзы изё куректӥсь гуртъёсыд.

Кый кадь чиляса-чиляса‚ ворекъяса‚
Ваткаен Камен бызё нёж вылтӥд шудыса:
Кӧкыысь нуныез кадь, тонэ соос лэйкато—
Сюлэмдэ нуныяса тынэсьтыд буйгато…

Туж паськыт шаерад нылъёсмурт кадь изиськод‚
Олокин дорад лыктоз шуса‚ весь возьмаськод…
Ачид султы‚ эн возьма!.. Шунды шоры ачид пот!
Лыктӥсь дорад уз луы — муртлы малы оскиськод?

Султы‚ ӝуткы… Собере‚ шундылы оскыса‚
Италмас кадь воштылы дӥсьёстэ дӥсяса:
Дӥся чебер айшондэ‚ ӝуткам‚ чильпам дӥсьёстэ‚
Гадяд пон жингыртӥсь‚ чилясь азвесь чигвесьтэ.

Серекъяса‚ кырӟаса‚ шудыса‚ эктыса‚
Кам вылтӥ юсь уям кадь каньылля поръяса‚
Шунды югыт шоры мын‚ неномырлэсь кышкатэк‚
Изем потэ, синмы мальдэ‚ учкем уг лу шуытэк.

Добавить комментарий

Ваш e-mail не будет опубликован. Обязательные поля помечены *